Aristanis - Su tzìrculu Culturale "Su Nuraghe" de Biella, sa Facultade Teològica Pontifìtzia de sa Sardigna, s'Istitutu de Sièntzias Religiosas de Aristanis, sa Provìntzia de Aristanis, paris cun sa Fundatzione "Sardinia" de Casteddu, cun s'agiudu de sa Regione Autònoma de sa Sardigna e su patronadu de s'Artzidiòtzesi de Aristanis, de sa Diòtzesi de Biella, de sa Tzitade de Biella e de sa Federatzione Assòtzios Sardos Itàlia, invitant a su Cunvegnu natzionale subra de sa limba mama “Deus cumprendet su sardu: faedda·ddu”/Dio capisce il sardo: parlalo, parlagli. “Pregare in sardu in Sardigna e foras dae s'Ìsula”/Pregare in sardo in Sardegna e fuori dall’Isola.
Sa manifestatzione est prevìdida pro sàbadu su 15 de santandria a sas 9,00 in s'Auditorium Hospitalis Sancti Antoni, in carrera de Sant’Antoni, in Aristanis. Domìniga su 16 de santandria de su 2014, a sas 10.30, Parròchia de Narbolia (Aristanis), Santa Missa narada “in Limba”.

De su “contributu” mandadu a sos familiares abarrados in pàtria si nde at faeddadu in tempos de crisi de su sèculu passadu, e solu finas a unu tzertu tempus. Oe non si nde faeddat si non pro africanos o rumenos. E puru, si dae su campu econòmicu si passat a cussu culturale, in tempos non de crisi, ma de rivendicatziones de “identidade”, tocat a reconnòschere su contributu chi prus che totu lompet a s'«ìsula» dae chie, aende·la lassada pro netzessidade o pro àtera resone, la irrichit torra cun un’orizonte tantu prus mannu cantu prus mannos sunt sa cussèntzia de s'importàntzia e de su significadu de sas orìgines pròpias. Custu est de seguru su chi est acontèssidu a Su Nuraghe, s'assòtziu, cun sede in Biella, de sardos meda chi bivent “in terra manna”. Pro custa resone, cun custu Cunvegnu, sa Facultade Teològica Pontifìtzia pro mèdiu de s'Istitutu Diotzesanu, S’Ufìtziu Limba Sarda de sa Provìntzia de Aristanis, s’assòtziu «Su Nuraghe» de Biella, cun s’isvilupu de argumentos diferentes, tenent s’isperu de agiudare a crèschere s’interessu siat pro sighire – cun su sentidu de s'inculturatzione antropològica e linguìstica – su traballu de sa bortadura de testos bìblicos siat pro donare balore a sas chi si narant “rimesse”, a su chi nos donat chie bivet a tesu dae sa “terra mama” e nde apretziat s'eredidade rica pro su tempus imbeniente. In su Cunvegnu s’at a resonare de duos “iscritos bìblicu-litùrgicos”, cuncordados dae pagu tempus in unu “laboratòriu teològicu-linguìsticu” fatu a intro de sos cursos de sa Facultade Teològica Pontifìtzia de sa Sardigna in Casteddu: unu primu testu pertocat una versione cumpreta, faeddos e mùsica, de sos Bèsperos de Nostra Segnora, chi s’est chèrfidu preparare tenende in contu sa difusione manna de su cultu marianu in s'ìsula e de sa traditzione antiga de tzelebrare sos Bèsperos in ocasione de sas festas de sos patronos; una segunda bortadura est sa de sa Liturgia eucarìstica, fintzas custa cumpleta cun faeddos e mùsica, preparada in ocasione de su permissu tentu a manera isperimentale dae parte de su Munsennore Ignazio Sanna, Artzipìscamu Metropolita de s'Artzidiòtzesi de Aristanis, de tzelebrare in limba sarda sa missa de su santu sardu, Santu Sadurru, in sa die de sa festa sua in Ìsili.

Su tzìrculu “Su Nuraghe” de Biella s'Istituto di Scienze Religiose de Aristanis sa Provìntzia de Aristanis paris a sa Fondazione Sardinia, Casteddu bos invitant a su cunvegnu | vi invitano al convegno Deus cumprendet su sardu: faedda·ddu/Dio capisce il sardo: parlalo, parlagli. Pregare in sardu in Sardigna e foras dae s'Ìsula/Pregare in sardo in Sardegna e fuori dall’Isola