Portu Turre - Apuntamentu cun s'istòria e su tempus coladu, cussu riservadu a sos Gigantes de Mont'e Prama, giòvia su 6 de santandria coladu in sa libreria internatzionale Koinè de Portu Turre in Cursu Vitòriu Emanuele 25. Una serada dedicata a sas ùrtimas iscobertas archeològicas de su situ de Cabras cun sa presentada de su volùmene "Giganti di Pietra" Fabula Editziones, iscritu dae Alessandro Bedini, Carlo Tronchetti, Giovanni Uras e Raimondo Zucca. S'iscoberta de su situ de Monte Prama at bogadu a campu una situatzione ispantosa, siat pro su nùmeru e siat pro sa mannària de sas istàtuas, siat pro su significadu culturale de su cuntestu intreu.
A sa fine de cabudanni, dae su situ archeològicu in s'artu de Cabras sunt essidos a pìgiu difatis duos gigantes pugiladores - e bi diat podet èssere su de tres, interradu a una profundidade prus manna - prus intreos e mescamente diferentes pro postura in cunfrontu a sas iscobertas betzas in s'àrea. Sos datos de iscavu, chi sunt presentados pro sa prima bia in custu volùmene a manera detalliada, permitent de propònnere un'ipòtesi de ricostrutzione de su sepolcru de s'Heroon. Sas istàtuas de sos pugiladores, artzieris e gherradores sunt unu signu potente chi marcat cun fortza su territòriu, tràmite s'ostentatzione de sos valores de sa comunidade aristocràtica de su de 8 sèculos a.C. A s'addòviu, moderadu dae Enrico Clemente, fiant presentes sos autores Carlo Tronchetti e Raimondo Zucca.