Tàtari - Milli òmines e fèminas chi in custu mamentu sunt in una cunditzione de povertade - de edade intre 35 e 60 annos, in 5 tzitades italianas: Milanu, Roma, Tàtari, Nàpoli e Catanzaro - sunt sos benefitziàrios de sa campagna noa de sensibilizatzione e regorta de fundos de sa Fundatzione Patrizio Paoletti. Cun unu sms solidale imbiadu dae su 2 a su 15 de santandria de su 2014 a su nùmeru 45509 est possìbile difatis a sustènnere una parte de su programma de sustegnu sotziale e alimentare “1 Milione di Pasti” chi, pensadu in antis pro sos Paisos in via de Isvilupu e a pustis aviadu in Itàlia in su 2012 pro parare fronte a su fenòmenu de importu de sas povertades noas, donat sustegnu a pessones sena domo fissa e in una cunditzione momentànea de istadu de povertade, cun s'obietivu de fàghere una rete de agiudu e de solidariedade chi agiudet s'essida dae custu mamentu de dificultade.
Su programma s'isvilupat ponende a costàgiu a sa partzidura de sos pastos caentes un'assistèntzia garantida dae voluntàrios cun sa cualìfica de "counselor" (professionistas de sas relatziones de agiudu), tràmite unu servìtziu pro ascurtare chie faghet nàschere unu diàlogu e orientat sa pessone in dificultade a unu protzessu de recùperu. Dae su chi est istadu aviadu duos annos a como, su progetu “1 Milione di Pasti” at partzidu in Itàlia 129 mìgia pastos riservados in totu a 4 mìgia pessones sena domo retzidas in sos tzentros de acollièntzia o acurtziadas dae sos servìtzios de primu sucursu in istrada, collaborende cun organizatziones in su territòriu. S'obietivu pro su perìodu atòngiu-ierru 2014-2015 est de partzire 36 mìgia pastos e arribare a milli pessones chi como sunt in cunditzione de povertade.