Casteddu - Sa Giunta presièdida dae Frantziscu Pìgliaru at aprovadu sa delìbera de nòmina de su professore Giosepe Pulina comente cummissàriu istraordinàriu de s'Ente Foreste de sa Sardigna pro ses meses. Sa Giunta at espressadu finas su nulla osta in su contu consuntivu de s'esertzìtziu 2013 de s'Ente. Un'atu chi faghet discùtere meda siat sa majoria siat s'opositzione de tzentru-dereta chi cun Pedru Pittalis faeddat de "giunta-numinifìtziu".
«Un’atzione iscullegada de sa Giunta chi non respetat su Cussìgiu». Gasi Pittalis cummentat sa delìbera leada pro su cummissariamentu de s'Ente Foreste. «Bene at fatu– sighit Pittalis - su presidente Ganau a pedire sa cantzellatzione de sa delìbera impreada dae s'esecutivu, ca non rispetat sas prerogativas de su Cussìgiu e firmat a manera forte su dibàtidu chi s'est faghende».
Novidades finas pro s'Ente "abbas pro sa Sardigna". Sa Giunta, semper in sa setziada de oe, at finas nominadu Giosepe Verona, ex diretore de sa Confindùstria Sud Sardigna, comente cummissàriu de s'Enas pro tres meses a tìtulu gratùitu.

In sa foto: Giosepe Pulina