Tàtari - In s'àmbitu de su progetu “Train…to be cool”, finas ocannu sunt torrados a incumintzare sos addòvios intre sos istudentes de sas iscolas mèdias e superiores de sa provìntzia de Tàtari e sos agentes de sa Politzia Ferroviària.
In sos addòvios, a parte crarire sos còmpitos de sa Politzia de Istadu, sos agentes presentant sos còmpitos de s'ispetzialidade de sa Politzia Ferroviària chi faghet s'atividade sua mescamente in sas istatziones ferroviàrias e in sos trenos, interessende·si de totu su chi pertocat s'àmbitu ferroviàriu: dae sos intzidentes, a sas iscortas viagiadores finas a s'investigatzione pro sos reatos chi interessant totu sa rete ferroviària natzionale.
Cun s'obietivu de sensibilizare sos giòvanos subra de sos perìgulos chi podent agatare cun cumportamentos de evitare, sos agentes, finas tràmite sa visione de diapositivas, a s'ispissu fatas dae sos istudentes matessi, ponent in evidèntzia fatos de crònaca capitados a beru chi si podiant istransire impreende règulas pagas e sèmplitzes.
Atentzione particulare la ponet sa Politzia Ferroviària pro educare sos giòvanos pendolares chi ant a èssere sos viagiadores de cras, chi pròpiu pro curpa de sos cumportamentos isballiados issoro, diant pòdere pònnere in perìgulu sèriu s'incolumidade issoro e cussa de sos àteros. In s'ùrtimu semestre de s'annu iscolàsticu coladu, sunt istados belle 900 sos pitzinnos chi sunt istados interessados a custu progetu e chi ant mustradu un'interessu veru pro sas temàticas afrontadas e, como, sunt giai programmados àteros chimbe addòvios cun àteros istitutos iscolàsticos.