Tàtari - Cras torrant a incumintzare sos traballos de su Cussìgiu Comunale de Tàtari. A sas 4 de borta de die, in setziada istraordinària e urgente de prima cunvocatzione, in sa sede de Palatzu Ducale b'at argumentos meda de discùtere. Si incumintzat cun sa motzione presentada dae su cussigeri de Cinque Stelle Maurìlio Murru pro su chi pertocat sos "Paràmetros chìmicos de sas abbas destinadas a s'impreu umanu diretu".
A pustis s'interpellàntzia presentada dae su cussigeri de Fortza Itàlia Manuel Alivesi subra de su "Sistema de cobertura de sas vias de su cummèrtziu de su tzentru. Progetu: sas ispassigiadas cobertas" e firmada semper dae su matessi cussigeri un'interrogatzione subra de sas tzelebratziones de su Primu de Martzu de su 2015, 100 annos dae sa Brigata Tàtari. A s'agabbu un'àteru documentu presentadu dae sa cussigera Desirè Manca subra de sa netzessidade de fàghere un'apotecaria in su bighinadu de Otava.
Sunt galu de esamenare, dae sas àteras setziadas, àteras duas motziones. Una presentada dae su cussigeri Antoni Panu subra de su bandu pro 3 chioscos noos pro sa bèndida de alimentos e bìbitas e s'àtera firmada dae su cussigeri Giosepe Màsala subra de "S'adotzione de su pianu pro nche bogare sas barrieras architetònicas dae parte de sa comuna de Tàtari".