Casteddu - Renato Soru leat prus de su 50% de sas preferèntzias e devenit su segretàriu nou de su Partidu Democràticu in Sardigna sena fàghere su ballotàgiu internu. S'europarlamentare e ex presidente de sa Regione at bintu contra a Innàtziu Angioni e in palas de issos b'est su giòvanu Thomas Castàngia.
Rispetados, duncas, sos pronòsticos de sa vigìlia chi naraiant chi Soru fiat su favoridu pro leare su postu de Sìlvio Lai. Paris a su segretàriu regionale, ant a èssere eletos finas 160 membros noos de s'Assemblea regionale de su Pd, dae sas listas chi ant sustènnidu Angioni, Castàngia e Soru in sos oto cullègios. A Casteddu ispetant 52 cumponentes, a Tàtari 35, a Nùgoro 17, a Aristanis 15, a sa Gaddura 14, a su Sulcis 12, a su Mèdiu Campidanu 11 e a s'Ogiastra 6.
Pro su segretàriu nou pesant sos cuntrastos reghentes chi ant caraterizadu sos cungressos a livellu locale: dae s'Alighera a Nùgoro, dae Macumere a Terranoa, dae Caragnani a Igrèsias. Divisiones e polèmicas chi ant pesadu finas in sa partetzipatzione a su votu (pagu prus o mancu 40 mìgia votos): difatis sos eletores sunt istados sa mitade in cunfrontu a su 2009.