Tàtari - Sos agentes de s'Iscuadra Mòbile de sa Cuestura de Tàtari ant notificadu s'avisu de agabbu de sas indàgines preliminares a s'apotecària tataresa de 49 annos P.G., provedimentu dispostu dae su sostitutu procuradore de sa Repùblica in su Tribunale de Tàtari Giovanni Porcheddu, chi at cuntestadu a sa professionista sos reatos de furtu agravadu e continuadu fatu cun dannu patrimoniale de gravidade manna, cun frode e abusu de relatziones de ufìtziu. Vìtimas, a parte su titulare de s'apotecaria e datore de traballu, finas carchi cliente chi non l'ischiat e intre custos finas antziaanos e pessones cun problemas cognitivos.
S'indàgine cumplicada meda fiat incumintzada in s'ierru de su 2012, a pustis chi su titulare de un'apotecaria famada de sa tzitade aiat presentadu a sa Politzia una denùntzia contra a anònimos, ponende in evidèntzia chi, dae unu pagu de tempus, cando bi fiat s'inventàriu de cadannu, si fiat iscumproada una pèrdida de "magasinu" de meighinas sena ispiegatzione e sighida, cun unu dannu de medas deighinas de mìgias de èuros e comente cunseguèntzia su de minimare a manera importante su faturadu e s'arriscu pro s'istabilidade econòmica de s'apotecaria. Fiant istadas fatas indàgines detzisas e difìtziles fatas cun atzertamentos documentales e informàticos pretzisos subra de su sistema gestionale de vèndida chi impreat su personale de s'apotecaria.
Setzi a pustis de un'atividade de osservatzione passentziosa e difìtzile cun telecàmeras postas in intro de s'apotecaria, cumbinada cun s'anàlisi atenta e sa ricostrutzione de sas operatziones informatizadas siat de sos registradores de cassa siat de su programma gestionale de s'azienda, sunt istados agatados indìtzios determinantes de sa curpa de s'apotecària infidele. Sa fèmina aiat pessadu carchi trampa e cun custos resessiat a evitare sos controllos de su titulare de s'apotecaria e a leare possessu in su tempus, de sos incassos, de sas meighinas e de sos parafàrmacos, abarrende pro meda tempus sena èssere punida e faghende a manera chi esseret impossìbile pro sos incuirentes a agatare sas proas in fragràntzia de reatu.