Tàtari - Cuntentos ma a mitade. Est custa s'impressione a pustis de s'addòviu àpidu in Casteddu intre sa Cgil Funtzione Pùblica, rapresentada dae su segetàriu Pàulu Dettori e s'assessora a s'Istrutzione Pùblica Clàudia Firino. In discussione s'assistèntzia a sos istudentes disàbiles. Comente giai naradu dae sassarinews, unu servìtziu pro su cale non bi diat dèvere èssere peruna casta de duda e imbetzes cadannu torrat a b'èssere su matessi problema ligadu a sa mancàntzia de dinare.
Finas ocannu, su matessi discursu. Pro custu motivu b'at àpidu s'atacu de Dettori a sa Regione e a sa Provìntzia. Ma s'assessora Firino no at pèrdidu tempus e at cunvocadu (lunis coladu in Casteddu) sindacadu e traballadores. Dae sa mesa regionale sunt essidas a pìgiu mescamente duas noas. Sa prima est chi sa Regione, in s'assestamentu de Bilàntziu votadu s'àtera die, at assignadu a sas Provìntzias in totu 5 milliones de èuros pro custu servìtziu e de custos, 850 mìgia a cussa de Tàtari, ma custa nd'at impignadu 600 mìgia e paret chi nd'at a abbarrare 250 mìgia. Una summa chi sa Cgil pedit chi siat destinada totu e in manera crara dae Palatzu Sciuti a sa cooperativa Genesi pro garantire su servìtziu " a su mancu finas a su mese de nadale, finas si - at torradu a nàrrere Dettori - amus dimandadu a s'assessora Firino de nos torrare a bìdere intro de su mese de nadale pro programmare sos àteros meses de s'annu iscolàsticu chi sighit dae su 7 de ghennàrgiu". In totu, su servìtziu costat 1 millione e 200 mìgia de èuros.
Sa segunda noa est chi sa Regione est contra a sa Provìntzia. Tocat de signalare difatis chi, comente naradu dae su sindacadu in s'addòviu, s'assessora Firino at ammentadu chi dae Palatzu Sciuti pro s'annualidade de ocannu "non sunt istadas fatas àteras rechestas pro pòdere parare fronte a sos costos de s'assistèntzia a sos istudentes disàbiles". Unu "ping-pong" chi tocat medas temàticas (bastat de bìdere su casu de sa Multiss e de àteras vertèntzias). Sa Provìntzia pro contu suo at faeddadu prus de una borta de comente sos trasferimentos sunt istados minimados meda e de comente sunt batende custos entes a mòrrere sena unu pianu normativu craru pro cumprèndere chie s'at a dèvere incarrigare pro totu sos servìtzios, cunsiderende finas s'assistèntzia a sos disàbiles


In sa foto: Pàulu Dettori

Nella foto Paolo Dettori