Casteddu - S'assessora regionale de sa Cultura e de s'Istrutzione Pùblica Clàudia Firino at addoviadu sos rapresentantes de sa Cgil pro faeddare de su deretu a s'istùdiu pro sos pitzinnos disàbiles. «Amus discùtidu cun su sindacadu - at pretzisadu sa delegada regionale - de sa situatzione e de sas crititzidades atuales, finas pro curpa de sa crèschida de su nùmeru de sos disàbiles. In s'addòviu apo torradu a nàrrere chi b'at a èssere s'impinnu de s'Assessoradu meu e de sa Giunta Regionale subra de custu tema dìligu».
Sa titulare de s'Istrutzione Pùblica at ammentadu s'istantziamentu, fatu cun deliberatzione, de 5 milliones de èuros pro garantire s'assistèntzia de sos pitzinnos de totu s'Ìsula. «Sa summa no est istada minimada - at sutaliniadu s'assessora regionale Firino - comente est capitadu imbetzes pro àteras boghes de su bilàntziu regionale. In prus, pro sa prima bia in assolutu, amus antitzipadu s'80% de su totale a s'incumintzu de s'annu iscolàsticu».
«Su nùmeru de sos disàbiles chi andant a iscola est creschende a manera costante - at naradu s'assessora - custu est unu signale positivu in su caminu de integratzione chi s'est faghende». Sa rapresentante de sa Giunta Pìgliaru at postu in evidèntzia comente subra de su tema bi devet èssere una sensibilidade majore e responsabilidade dae parte de totu sos livellos istitutzionales e chi sa Regione at mantènnidu e at a mantènnere sos impinnos suos. «Si at a sighire una situatzione de crititzidade - at congruidu s'assessora Firino - s'Assessoradu at a intervènnere, dae su mese de ghennàrgiu de su 2015, cun sas risursas de su bilàntziu imbeniente».


In sa foto: s'assessora regionale Clàudia Firino