Casteddu - «Sa Sardigna est a tretu de parare fronte a unu possìbile casu de infetzione de su virus de s'èbola». A lu nàrrere est istadu s'assessore regionale de sa Sanidade Luigi Arru, chi at cussigiadu prudèntzia: «Non devimus pònnere in fastìgiu sa populatzione sena motivu. Sa situatzione in s'ìsula est suta controllu».
Difatis, giai in austu, cando est istada decrarada s'emergèntzia internatzionale, sa Regione at avisadu sos responsàbiles de sos tzentros de sas maladias infetivas de Casteddu e de Tàtari. «Amus fissadu deretu sas lìnias de traballu – at pretzisadu s’assessore Arru - e ativadu totu sas mesuras preventivas, pràticas e operativas, ponende a disponimentu finas cursos de sensibilizatzione a su tratamentu de sa matèria, verifichende sa reatividade de risposta chi pesso siat bona meda».

«In Sardigna amus totus sas cumpetèntzias e semus acreditados pro retzire e distìnghere unu sugetu eventuale chi siet "portatore" de su virus de s'èbola, e parare fronte in custa manera a su problema». A pònnere in fastìgiu s’assessore Arru est un'àtera crititzidade sanitària: «In s'Ìsula, prus de s'èbola– at naradu s’esponente de sa Giunta Pigliaru - timo su fatu chi siant creschende sas infetziones comente s'Aids, sa sifìlide e sa tubercolosi».

In sa foto: s’assessore regionale Luigi Arru