Tàtari – Sa Sanidade sighit a rapresentare unu de sos problemas de su "sistema Itàlia". Est Tàtari custa borta a nche intrare in sas primas pàginas de sa crònaca natzionale. Gian Antonio Stella, giornalista e
iscritore famadu pro sos libros suos contra a sa “casta”, in sas pàginas de su
Corriere della Sera faeddat de unu casu chi pertocat sa Asl de Tàtari e su diretore generale Marcello Giannico

In s'artìculu, su cronista faghet riferimentu a una lìtera in posta eletrònica imbiada dae su diretore generale a sa diretora betza Angela Cavazzuti, in ue Giannico paret chi apat racumandadu de matènnere unu passivu de bilàntziu, a su contràriu de su chi naraiant sas règulas de unu cumportamentu aziendale bonu, galu de prus pro un'ente chi traballat in una matèria dìliga meda comente sa sanidade. In s'artìculu b'at frases comente : «s’approvatzione de su bilàntziu 2010 cun sas retìficas chi apo cussigiadu. Ammento chi in Regione b'at 120 milliones lìcuidos de totu sas Asl sardas. Sutalìnio chi custu dinare devet andare a sas Aziendas chi ant àpidu perdìdas e non parègios de bilàntziu».
In àteras paràulas cussu bilàntziu caraterizadu dae su cuntenimentu de sos costos no andat bene ca est tropu pagu in ruju: est sa sìntesi crara chi nde faghet Stella in s'artìculu suo. Custa istòria fotògrafat unu periodu chi incumintzat in su 2011, giai ogetu de indàgines de su pùblicu ministeru Gianni caria e chi, segundu sos incuirentes, ponet in craru unu sistema finalizadu a fàghere essire a campu sos bucos virtuales de su bilàntziu, ùtiles pro otènnere finantziamentos prus artos dae sa Regione. A pustis de sos giornales, sa paràula a sos giùighes.