TATARI - Su 26 e su 27 de cabudanni, in ocasione de sa Die Europea de sas Limbas, sos sitos de informatzione Alguer.cat e Tatari.it sunt ammaniende duas cunferèntzias in Tàtari e in s'Alighera. Su Cussìgiu de Europa, paris a s'Unione Europea, ant decraradu s'annu 2001 "Annu europeu de sas limbas". Cada annu su 26 de cabudanni si festat sa Die Europea de sas limbas in 47 Istados membros de su Cussìgiu de Europa cun s'obietivu de promòvere sa diversidade linguìstica.

Chenàbura chi benit, su 26 de cabudanni in Tàtari, in sa sala de sas cunferèntzias de su Museu Sanna (carrera de Roma 64), a sas chimbe e mesa de borta de die, b'at a èssere sa cunferèntzia “Alguer.cat - Tatari.it. Catalanu de s'Alighera e Sardu: limbas chi informant”. In custa ocasione b'at a èssere sa presentada de su cuotidianu nou in rete Tatari.it, sa versione totu in limba sarda de sa testada SassariNews.it. Sa serada, ammaniada in collaboratzione cun su Ministeru de sos Benes culturales, s'at a abèrrere cun sos saludos de Gabriella Gasperetti, diretora de su Museu, e de s'editore Marco Vukic chi at a presentare su progetu nou in limba sarda e sa rete sarda de cuotidianos locales cullegados in rete. Su dibàtidu at a èssere moderadu dae Juvanna Tuffu, responsàbile linguìstica de sa testada, cun sos interventos de Diegu Corràine - editore e tradutore, Giuliana Portas - responsàbile linguìstica de Alguer.cat e Franca Masu - artista e cantadora de s'Alighera. Sunt invitados a leare parte a sa serada sas autoridades polìticas de su territòriu.

Sàbadu, su 27 de cabudanni in s'Alighera, in su Museu de su Coraddu (carrera de XX de cabudanni n.8), a sas 11 de mangianu, b'at a èssere sa cunferèntzia Alguer.cat - Tatari.it. Català de L’Alguer i Sard: llengües que fan notícia” in ocasione de ses annos de atividade de Alguer.cat, su primu cuotidianu italianu in limba catalana de s'Alighera. Sa serada s'at a abèrrere cun sos saludos de su diretore Pascale Chessa e s'editore Marco Vukic chi at a contare una manera de fàghere informatzione fitiana pro ispartzinare e valorizare su catalanu chi in su tempus at bogadu a campu sa curiosidade e s'interessu de medas letores. Su dibàtidu at a èssere moderadu dae Giuliana Portas, responsàbile linguìstica de sa testada Alguer.cat. Ant a intervènnere Franca Masu - artista e cantadora de s'Alighera, Juvanna Tuffu - responsàbile linguìstica de Tatari.it e Diegu Corràine - editore e tradutore. A sa cunferèntzia sunt invitadas sas autoridades polìticas de su territòriu.

S'ocasione at a èssere s'ocasione bona pro discùtere cun sos operadores editoriales e sos ispàtzios ocupados dae sas minorias linguìsticas in Sardigna e presentare su traballu de sas professionalidades linguìsticas chi òperant in custu setore. Custas duas initziativas ammaniadas in Sardigna cherent mustrare comente sa limba sarda e catalana podent èssere unu canale de trasmissione e de informatzione e interessare medas letores chi setzi cun unu ligàmene (link) podent intrare deretu a sas pàginas de Alguer.cat e de Tatari.it. Totu sos eventos europeos, cunsiderende finas cussos ammaniados in Tàtari e in s'Alighera, si podent bìdere in su situ ufitziale de su Cussìgiu de Europa - Die Europea de sas Limbas (Giornata Europea delle Lingue: http://edl.ecml.at/).