Tàtari – Ant giai incumintzadu s’atividade issoro in sos setores de s’amministratzione comunale e, gràtzias a su traballu issoro, sunt istados giai recuperados caminos betzos tratzados in su birde chi fiant istados cuados dae sa vegetatzione in zonas diferentes de Monte Bianchinu e Santu Frantziscu. Sunt sos traballadores sos benefitziàrios de ammortizadores sotziales chi, gràtzias a s’adesione de sa Comuna de Tàtari a su pranu istraordinàriu de sa Regione Sardigna, ant a pòdere tènnere sos sussìdios istraordinàrios una tantum pro 700 èuros a su mese pro ses meses in totu, a patu chi siant disponìbiles a fàghere sas atividades programmadas dae sa Comuna pro 20 oras a sa chida. S’Agentzia regionale de su traballu èrogat su sussìdiu in favore de sos benefitziàrios e trasferit a sa Comuna unu contributu de 300 èuros una tantum pro cada traballadore. Custu tantu de dinare est impreadu pro sustènnere sos costos chi pertocant sas assicuratziones obrigatòrias, materiale antinfortunìsticu, de consumu e àteras ispesas gestionales eventuales . Custos trinta traballadores noos sunt istados postos in setores diferentes de s’amministratzione comunale tataresa. Bìndighi ant a èssere impinnados in su setore edile, sos àteros bìndighi, chi benint dae su setore “genèricos” ant a èssere impinnados pro agiudare s’atividade amministrativa. Prus a dae in antis ant a èssere impreadas àteras unidades chi in parte ant a èssere impinnadas finas pro torrare a dare vida noa a sos ispàtzios de su mercadu tzìvicu betzu e Tàtari.