Tàtari - Un'antitzipatzione de 600 mìgia èuros - leada dae sos 35 milliones de integratzione noa de su fundu ùnicu pro sos Entes locales - pro garantire sos servìtzios a sos tzitadinos erogados dae sa Multiss, est istada autorizada tràmite una lege aproada custu mangianu in Cussìgiu Regionale. Unu provedimentu de urgèntzia, sena passàgiu in cummissione, impreende s'artìculu 102.

Gràtzias a custas siendas sa Multiss, sotziedade "in house" de sa Provìntzia de Tàtari cun 160 dipendentes, at a pòdere sighire in s'atividade de manutentzione de sos edifìtzios iscolàsticos e de sas carreras.
«Est istada agatada una solutzione tècnica cun sa voluntade unànime de su Cussìgiu regionale - at naradu s'assessore regionale de sos Entes Locales Cristiano Erriu - chi sa Giunta at cumpartzidu e chi faghet isperare pro sa Reforma de sos Entes Locales, in ue at a èssere esaminadu su tema de torrare a pònnere òrdine in sas cumpetèntzias de sas Provìntzias e duncas finas sas sotziedades in house».