Tàtari - Su mercadu de Campagna amica de s'Emitziclu in Tàtari s'irrichit de unu servìtziu nou. Si tratat de sa cunsigna a domitzìliu de s'ispesa in bitzicleta.
S'atividade est possìbile gràtzias a sa "partnership" chi s'agrimercadu de Campagna Amica de Tàtari at fatu cun “Orobici Sardegna”. Est una realidade chi òperat giai in totu sa tziutade, cun medas servìtzios Urban-Express totu birdes ("green"), gràtzias a medas bitzicletas e tritziclos elètricos, atrezados pro sos trasportos urbanos finas a 100 kg.
In custa manera, sustenende unu costu agiuntivu nou, sos chi còmporant in su Mercadu de su sàbadu mangianu s'ant a pòdere fàghere imbiare s'ispesa in manera prus ecològica possìbile: in bitzicleta. «Si tratat de una partnership de importu mannu - ant naradu Vanni Lubinu e Giosepe Casu, s'unu Presidente de s'Agrimercadu de Tàtari e s'àteru Diretore Vicàriu de Coldiretti Tàtari - e cun sa cale tenimus duos obietivos: dae un'ala donamus a sos tzitadinos una manera prus simple pro comporare, dae s'àtera ala faghimus un'atzione chi est in lìnia cun sa filosofia de su Progetu de Campagna Amica, cussa de innestare in totu sos mamentos de sa vida de cada die, e duncas finas durante s'ispesa, elementos de tutela e de rispetu de s'ambiente».