Tàtari - Tàtari intrat in campu pro promòvere su beneistare psicofìsicu, s'impreu de mèdios alternativos a sa machina e pro minimare sas emissiones de CO2 in s'àera. E l'at a fàghere sàbadu, a sas 9, in Pratza de Itàlia, in ocasione de sos apuntamenos programmados pro sa Chida europea de sa mobilidade sustenìbile. Sa Comuna de Tàtari, in collaboratzione cun sa Uisp de Tàtari e s'assòtziu isportivu diletantìsticu Currichisimagna, organizat duos eventos distintos.
In su primu b'ant a èssere sos pitzinnos de su segundu Tzìrculu Didàticu "San Giuseppe", chi ant a pòdere fàghere programmas de educatzione istradale ammaniados dae sos animadores Uisp in sa pratza. Dae sas 9 a sa una, ant a èssere postos de badas e a disponimentu de sos pitzinnos monopàtinos, pedobike, carritos e àteros giogos cun sas rodas pro imparare, tràmite su giogu e s'esperièntzia direta, su significadu de sos cartellos prus comunos de sa signalètica istradale.
Su segundu eventu, abertu a totus, est un'ispassigiada in su tzentru istòricu de sa tzitade pro iscobèrrere gùturos e carreras minores, domos e logos chi ammentant e contant sèculos de istòria de sa tzitade.
S'apuntamentu est pro sas 9,30 de mangianu, mentres sa partèntzia est prevìdida pro sas 10 de mangianu. Custu est su percursu: Pratza de Itàlia, Pratza de Castello, Largu de Cavallotti, Pratza de Azuni, Cursu Vitòriu Emanuele, Carrera de Santa Caterina, Pratza de Santa Caterina, gùturu de su Campanile, Pratza de Duomo, Carrera de Madalena, Pratza de Quadrato Frasso, Carrera de Sant’Apollinare, Cursu Vitòriu Emanuele, Carrera delle Muraglie, Carrera de Rosello, Carrera de La Marmora, Pratza de Tola, Pratza de Azuni, Carrera de Luzzati, Pratza de Castello, Pratza de Itàlia.