Nùgoro – Su Trenu birde de sa Sardigna cun 70 turistas e duos machinistas at deviadu oe a ora de sas 11,20 de mangianu a s’artària de s’istatzione de Seui, dae ue su trenu fiat in pessu partidu. Nemos est abarradu feridu.Unu guastu tècnicu improvisu at fatu dannu a sa motritze chi est essida dae sos binàrios, mentres duos vagones sunt abarrados a su postu issoro. Sos turistas chi aiant dèvidu cumpretare su giru panoràmicu in Mandas sunt istados acumpangiados a sa bidda dae unu postale e dae inoghe a Arbatassa.S’assessore de sos Trasportos Massimo Deiana, a pustis de àere ischidu sa noa de oe de su deralliamentu de su Trenu birde at cuntatadu personalmente sos cabos de s’Arst pro s’informare subra de s’incolumidade de sos passegeris. A pustis de àere retzidu unu cunfortu mannu, at dimandadu sos detàllios subra de s’assistèntzia a sos viagiadores chi sunt istados protetos e ant pòdidu cumpretare s’esperièntzia turìstica gràtzias a una vetura sostitutiva. S’esponente de sa giunta Pìgliaru, in fines, at dimandadu a sos cabos de s’Arst de èssere informadu subra de sos èsitos de s’inchesta interna aberta pro definire sas càusas de su guastu.