Tàtari – Su Bancu de Sardigna Dìnamo Tàtari s’est presentadu a manera ufitziale chenàbura sero, in sa serada ammaniada in sas bìngias galanas de Sella & Mosca, in s’Alighera. E su logu est istadu s’argumentu de su primu iscàmbiu de fràsias brulleras intre sa madrina de sa serada Elisabeta Canalis e su “mere de domo” Antoni Posadinu, bidu chi est inoghe chi, intre una deghina de dies, est prevìdidu s’isposòngiu de s’artista tataresa. A pustis, est istadu fatu logu a su presidente de sa Dìnamo Istèvene Sàrdara chi cun Canalis at presentadu sos “isponsor” prus mannos de s’iscuadra. A mangianu, in sa motonave “Nuraghes” de sa “Tirrenia”, sa sotziedade “biancoblu” aiat pesadu su velu subra de sa màllia noa pro s’istajone 2014/15, chi at a debutare oe, in su segundu torneu internatzionale “Geovillage” in Terranoa.A pustis de sa presentada de su grupu sotzietàriu, tècnicu, sanitàriu e logìsticu, est tocadu a s’allenadore Meo sacchetti, unu presentadore de esperièntzia, a artziare a su palcu pro espònnere sa lista noa de giogadores. Una batuta pro cadaunu de sos pitzinnos suos, intre caras de risu e aplàusos. E a pustis s’ “in bocca al lupo”: s’istajone podet incumintzare.Sas telecàmeras de IsolaMedia ant sighidu s’eventu e sunt istados intervistados s’allenadore Sacchetti, sos giogadores Giacomo Devecchi, Brian Sacchetti e Manuel Vanuzzo, su “general manager” Federico Pasquini e su presidente de sa Provìntzia de Tàtari Alessandra Giudici, tifosa manna de sos “biancoblu”.