Tàtari – Problemas giuditziàrios pro unu tataresu a su tzentru de un’inchesta de sa Guàrdia de Finantza de Tàtari pro reatos de esertzìtziu abusivu de sa professione de cummertzialista e trufa. Segundu su chi ant ipotizadu sas Frammas Grogas, s’òmine de 44 annos diat devet àere trufadu carchi cliente ponende·si in bùssia dinare e mantenende·si impostas e tassas chi tocaiant a s’Eràriu e finas onoràrios pro prestatziones professionales de fàghere in carchi ente, comente sa sotziedade de riscossione de sos tributos “Equitalia” e s’Agentzia de sas Intradas.Prestatziones chi, segundu s’ipòtesi acusatòria, paret chi non bi siant istadas mai mancari bi siant documentos chi nde dimustraiant sa resèssida bona. Su cumportamentu farsu pertocaiat sa mustra de isgràvios graes de impostas de s’Agentzia de sas Intradas e bulletinos postales de versamentu farsos de impostas rateizadas dae sos ufìtzios finantziàrios.Una trufa chi paret apat fatu medas vìtimas, pro unu profetu finas a como atzertadu dae sa Guàrdia de Finantza de prus de 250 mìgia èuros ma chi est istada iscoberta gràtzias a sa denùntzia de un’imprendidore chi si chessaiat de un’atzertamentu, chi non s’isetaiat, de s’ufìtziu cumpetente pro impostas giai pagadas a custu farsu cummertzialista. Abigiadu de sa trufa, s’imprendidore at mutidu sa Guàrdia de Finantza chi at fatu aprofundimentos investigativos chi si sunt concruidos sas dies coladas cun s’esecutzione de un’ordinàntzia impositiva de sos arrestos domitziliares