Tàtari – Arveschende a noe, arrestadu dae su Nas de Tàtari unu dirigente ortopèdicu in servìtziu in sa Asl n.1. S’acusa, pro su dotore a sos arrestos domitziliares, est de trufa agraviada a dannu de su SSN, falsu, abusu de ufìtziu e peculadu.Sas indàgines sunt incumintzadas prus de un’annu a como. Segundu sos militares de su Nùcleu Antisofisticatzione e Sanidade, s’ortopèdicu a manera arbitrària faghiat atividade professionale de caràtere privadu in unu tzentru de meighina isportiva e fisioterapia gestidu dae sa mugere, mancari esseret àpidu unu raportu de esclusiva cun s’Azienda sanitària a ue andaiat pro timbrare e a pustis si nche andaiat deretu.Dae sas indàgines paret chi su sanitàriu impreaiat sas aparechiaduras de sa Asl pro sas visitas privadas e, in un’ocasione, sos carabineris ant atzertadu chi aiat incassadu su pagamentu de una vìsita mèiga chi deviat èssere dada a sa Asl. In s’àmbitu de sa matessi operatzione su tzentru est istadu sutapostu a secuestru e sunt istados denuntziados su diretore sanitàriu de s’ambulatòriu e comente responsàbile legale, sa mugere de s’arrestadu.