Tàtari – Est istadu formalizadu chenàbura dae sa Giunta Regionale s’atu chi cunfirmat s’organizatzione de sa rete iscolàstica de sa provìntzia de su Mèdiu Campidanu ( in cullegamentu cun sa Comuna de Biddacidru) e s’ativatzione de su Litzeu Sientìficu cun indiritzu isportivu pro sa provìntzia de Tàtari, in su Cunvitu natzionale “Canopoleno” de Tàtari.A pustis de sas sentèntzias de su Tar Sardigna, sa delìbera proposta dae s’assessora regionale de s’Istrutzione Clàudia Firino sanat su vìtziu de forma de su Pianu de dimensionamentu de s’Amministratzione Regionale de in antis, ca ant detzìdidu su rinviu de su Pianu 2014-15 a sa cummissione cunsiliare cumpetente pro s’acuisitzione de su pàrrere mancante. «Unu provedimentu obrigadu pro fàghere incumintzare cun serenidade s’annu isclàsticu a pustis de sos fastìdios legìtimos de sas famìlias cajonados dae chie nos at pretzèdidu. In custa manera asseguramus a sos pitzinnos nostros su deretu a s’istùdiu rispetende sos issèberos e sos talentos issoro» at decraradu Firino chi, faeddende a su mundu de s’iscola, faghet ischire chi s’istrutzione est una prioridade de sa Giunta Pìgliaru comente est craru in sa majoria de sas comunas chi est retzende su dinare pro s’edilìtzia iscolàstica e chi «s’Assessoradu est traballende meda pro presentare deretu sa lege pro ordinare torra su sistema de s’istrutzione in Sardigna e tràmite custa at a èssere possìbile prevìdere un’organizatzione de sa rete iscolàstica in sintonia perfeta cun sas caraterìsticas, esigèntzias e aspiratziones de sa Sardigna».