Tàtari – Sa Comuna de Tàtari at detzìdidu de parare fronte a s’emergèntzia ìdrica de custas dies dende a sa tzitadinàntzia abba potàbile tràmite autobotes tzertificadas dispostas in su territòriu in positziones istratègicas. A pustis de sos ùrtimos esàmenes fatos dae sa Asl subra de s’abba de sa condota chi aiant inditadu paràmetros con cunformes pro carchi bighinadu de sa tzitade, s’Amministratzione at prevìdidu de pedire carchi autobote tzertificada. Dae sàbadu su 30 de austu a lunis su 1 de cabudanne, sas autotzisternas at a èssere dispostas in zonas diferentes de sa tzitade a manera de servire totu sos bighinados chi non tenent abba potàbile (Carbonazzi, Monte Rosello, Latte Dolce e Santa Maria de Pisa). B’at a èssere una postatzione fissa in carrera de Bachelet ed àteras mòbiles in Pratza de Segni, in Pratza de Sacro Cuore ed in Carrera de Kennedy.Sas autobotes ant a èssere presentes in custos oràrios: sàbadu su 30 de austu, dae sas 11.30 a sas 17, in Pratza de Segni e in Pratza de sacro Cuore; domìniga 31, dae sas 11.30 a sas 17, in Pratza de Segni ed in carrera de Kennedy; lunis su 1 de cabudanne, dae sas 11.30 a sas 17, in carrera de Kennedy ed in Pratza de Sacro Cuore. In carrera de Bachelet at a èssere a disponimentu sa rastrelliera cun sos rubinetes de “Abbanoa”. Cada tzitadinu at a pòdere leare non prus de 30 litros de abba.