Tatari.it
Noas    Vìdeu   
Tatari.itnotiziesassariSportBasketBatijimu Dìnamo cun Elisabeta Canalis in Sella&Mosca
Antonio Burruni 29 agosto 2014
A pustis de su Welcome Day de mèrcuris coladu in sa piscina de su Geovillage de Terranoa, su Bancu de Sardigna at a èssere presentadu a manera ufitziale chenàbura su 5 de cabudanne a sa 18,30 acumpangiadu dae sa madrina Elisabeta Canalis
Batijimu Dìnamo cun Elisabeta Canalis in Sella&Mosca


Tàtari - A pustis de su Welcome Day de mèrcuris coladu in sa piscina de su Geovillage de Terranoa, in ue sunt faghende sa prima fase pro ammaniare su precampionadu, su Bancu de Sardigna s’est aprontende pro sa presentada ufitziale chi at a èssere chenàbura su 5 de cabudanne a sas 18,30 in sas bìngias “Sella e Mosca” de s’Alighera.Madrina de sa manifestatzione at a èssere Elisabeta Canalis chi retzit su testimone dae Melissa Satta, chi in sas ùrtimas duas istajones est istada madrina de s’iscuadra “biancoblu”. At a èssere s’ocasione pro torrare a bìdere s’allenadore Meo Sacchetti e su grupu intreu a disponimentu suo, dae sos cunfirmados Giacomo Devecchi, Massimo Chessa, Brian Sacchetti, Manuel Vanuzzo ed Amedeo Tessitori, a sas novidades diferentes arribadas dae s’ùrtimu mercadu tataresu. Semus faeddende de sa guàrdia istatunitense-dominicana Edgar Sosa (dae su Ratiopharm Ulm), de s’istatunitense Rakim Sanders de 25 annos (dae su Bamberg), de su nigerianu de 29 annos Shane Lawal (dae Astana), de sa play-guardia istatunitense de 27 annos Jerome Dyson (dae Enel Brìndisi), a s’istatunitense Jeff Brooks (dae Pasta Regia Caserta) e de sa ala-pivot bosniaca de 29 annos Miroslav Todic (dae Enel Brìndisi).Imbetzes, una die in ants, giòvia su 4 a sas 11 in s’istrutura isportivu-ritzetiva de su Geovillage de Terranoa, sa sotziedade “biancublu” at a presentare sa segunda editzione de su “Trofeo Internatzioneale Geovillage” chi at a bìdere impignados sos tataresos sàbadu su 6 e domìniga su 7 de cabudanne in sas isfidas contra a Vl Pèsaro, Lokomotiv Kuban e Darussafaka. A sa cunferèntzia istampa de presentada, ant a èssere presentes su presidente Stefano Sàrdara, su bitzecapitanu Jack Devecchi, su mere de su Geovillage Gavino Docche e su responsàbile de “Costa Eventi” Pasquale Cossu.
Commenti
Regione Sardegna
Progetu finantziadu dae Fondazione di Sardegna
Responsàbile linguìstico: Mario Sanna
© 2000-2021 Mediatica sas