Istintinu – Una festa de colores, de mùsica e de ispàssiu in sas carreras de sa bidda chi, pro una note intrea, sunt devènnidas un’ìsula pedonale manna pro ospitare sa “Notte bianca stintinese, accadde tutto in quella notte…”. Sàbadu, in su tzentru de sa bidda de sos piscadores est istada inaugurada sa de ses editziones de sa manifestatzione e meda est istada sa cuntentesa de sos istintinesos e de sos turistas pro s’eventu organizadu dae s’Assessoradu Comunale a su Turismu, dae sa Pro Loco e dae sos Assòtzios “Limes”, “Ittiri Cannedu”, “Stintino Music School” e “Parada”. Dae su portu Minori a su portu Mannu, colende pro carrera de Sassari e Largu Cala d’Oliva sa partetzipatzione de su pùblicu est istada manna.Ant abertu sa serada sos palliàtzios, sos trucapitzinneddos e sos giogolieris de “Parada, i ragazzi di Bucarest”. Cun issos pratza Segni, Largu Cala d'Oliva e su Lungomare Colombo, a faca a sa Dàrsena, si sunt animados de colores e de giogos tìpicos de sas artes de su tzircu. B’at àpidu finas s’isfilada de sas caratzas e de grupos sardos comente su grupu de Sarule cun sa “Maschera a Gattu”, “Sos Corriolos” de Neoneli e “Boes e Merdùles” de Otzana, sos grupos folk de “Su Idanu” de Cuartu Sant’Aleni, “Pro loco”de Samugheo, “Tuffadesu” de Òsile, “Intragnas” de Portu Turre e “Ittiri Cannedu” de Ìtiri. Sas atividades cummertziales sunt abbarradas abertas finas a tardu mannu. In sa foto: su grupu folk Ittiri Cannedu