S'Alighera - Alguer.cat, su primu cuotidianu italianu in limba catalana (de s'Alighera - aligheresu) crompet 6 annos. In su mese de austu de su 2008 est nàschida sa prima publicatzione pro propònnere un'informatzione cumpreta e mescamente pro dare sa possibilidade a sos aligheresos de fàghere intèndere sa boghe issoro e pro acurtziare s'Alighera a sa Catalugna, a sas ìsulas Baleares e a sos Paisos Valentzianos. In su 2008 Alguer.cat est istadu presentadu in s'Alighera dae s'Assessora a sa Cultura de sa Regione Sardigna Maria Antonietta Mòngiu, cun sa presèntzia de sas istitutziones locales e provintziales, e at agatadu deretu sa cuntentesa de sos aligheresos e de sos catalanos continentales. Iscritu in sa variedade aligheresa de su catalanu, est su primu esempru in su panorama natzionale de informatzione in limba catalana de s'Alighera.

Su cuotidianu naschet gràtzias a sa collaboratzione de carchi assòtziu culturale de su territòriu, tenet su suportu de su Servìtziu Limba e Cultura sarda de s'Assessoradu a s'istrutzione pùblica de sa Regione Autònoma de Sardigna e faghet riferimentu a sa populatzione aligheresa e a totu sos chi faeddant su catalanu in su mundu chi ant a èssere intre sos 8 e sos 10 milliones. Sos contenutos sunt aprofundimentos de noas curtzas publicadas in su situ italianu Alguer.it, cuotidianu de s'Alighera.
Una manera noa de fàghere informatzione cada die chi contrìbuit a ispainare sa limba e in su tempus a fàghere nàschere sa curiosidade e s'interessu de sos letores chi cun unu click podent intrare deretu a sas pàginas de Alguer.cat. Su cuotidianu cheret trasmìtere su patrimòniu linguìsticu locale a sa generatziones noas. Un'ispàtziu editoriale ligadu a sa cuntemporaneidade tràmite s'impreu de sa limba aligheresa pro nde afortire s'impreu normale e su valore suo.
Alguer.cat pùblicat a manera regulare dae su 2008 cun agiornamentos in tempus reale tràmite s'inditzizatzione de custos in rubricas ispetzìficas (Primera Pàgina –Sardenya –Alguer –Crònica –Esports - Política – Turisme –Cultura i Societat –Ambient i territori – Espectàcul –Economia – Salut) e mescamente torrat dignidade e prestìgiu a su catalanu de s'Alighera tràmite s'iscritura de artìculos chi pertocant argumentos diferentes cun su coordinamentu de sa responsàbile linguìstica Giuliana Portas.

Est dae custa esperièntzia positiva de Alguer.cat chi dae pagu tempus dae su situ Tatari.it si podet visitare sa versione in limba sarda de sa testada Sassarinews.it.
Tatari.it tenet s'obietivu de fàghere un'informatzione in sardu cada die gràtzias a sa collaboratzione de sa responsàbile linguìstica Giovanna Tuffu. Su progetu editoriale nou at a èssere presentadu a manera ufitziale in su mese de cabudanni in duos addòvios pùblicos in Tàtari e in s'Alighera. At a èssere cussa s'ocasione pro discùtere cun sos operadores editoriales subra de sos ispàtzios dedicados a sas minorias linguìsticas in Sardigna e pro presentare su traballu de sas professionalidades linguìsticas chi traballant in custu setore.