Sènnaru - Sas eztellèntzias de sos vinos locales, ispetzialidades gastronòmicas traditzionales, mùsica, ispetàculu e cultura: s'8 e su 9 de austu Sossu e Sènnaru rennoant s'apuntamentu cun "Calici di stelle", sa manifestatzione chi ponet in evidèntzia sas produtziones enogastronòmicas de sa Romàngia, donende a sos turistas e a sos visitadores duas seradas pro fàghere promotzione de su màndigu e de s'ispàssiu. Sa prima tapa de sa manifestatzione est prevìdida pro chenàbura s'8 de austu in Sossu, mentres sàbadu su 9 sa festa de su vinu e de su màndigu s'at a iscostiare a Sènnaru.
Giai dae sas 8 de sero turistas e visitadores ant a pòdere ispassigiare intre sas carreras de sos tzentros istòricos de sas duas biddas in ue comporende unu càlighe de birdu ammaniadu pro s'ocasione e unu tantu de billetes, ant a pòdere testare sos vinos de sas cantinas locales e sos pratos tìpicos ammaniados dae sos ristoradores locales. Totu custu in suta de su chelu isteddadu chi b'at a èssere sa note in antis de Santu Larentu, acumpangiados dae cuntzertos musicales e dae istruturas artìsticas, allestidos afaca a sos angrones prus caraterìsticos de sas duas biddas.
Finas pro s'editzione 2014 de "Calici di stelle" sas amministratziones comunales de Sossu e de Sènnaru ant àpidu sa collaboratzione de sa Regione Sardigna, de sa Provìntzia de Tàtari, de sa Càmera de Cummèrtziu Nord Sardigna, s'Assòtziu natzionale "Città del vino", sa Pro Loco Sènnaru, sa cooperativa sotziale Àndala de Amistade e medas assòtzios culturales locales. Ant a èssere 14 sas cantinas chi ant a leare parte a sa manifestatzione e ant a èssere medas sos eventos collaterales.
A Sènnaru s'at a pòdere visitare sa Mustra de su Custùmene ammaniada dae Vanna Sassu in s'auditòrium de su Tzentru culturale e, in largu Asproni, sa mustra fotogràfica de Simona Goxhoi (bistires de Sònia Flauto)
“Nella cruna… una setola”. Semper in Sènnaru, a sas sete e mesa de sero in sa pratza de su Tzentru culturale b'at a èssere su cuntzertu e su sàgiu finale de s'Iscola musicale e teatrale Endas, e a sas 9 de sero s'at a pòdere abbaidare in s'anfiteatru de su Tzentru culturale s'ispetàculu de dantza isportiva cun s'iscola de ballu Victory Dance, e a sos ballos sardos tìpicos cun su Grupu Janas Folk de Sènnaru.

In sa foto: sa cunferèntzia istampa de presentada