Tàtari - Dae su mese de cabudanni in s'AOU (Azienda Ospedaliera Universitària) de Tàtari at a èssere possìbile a fàghere sos primos tratamentos de radioterapia a intensidade modulada, una tecnologia chi faghet a manera de tratare unu malàidu oncològicu cun pretzisione arta, minimende in su matessi tempus s'arriscu de efetos collaterales a tempus longu. Custa casta de tratamentu at a èssere fatu cun su Collimadore Multilamellare chi est in dotatzione a s'atzeleradore liniare Varian 600, aparèchiu chi sunt impreende in sa Setzione de Radioterapia de s'UOC de Radiologia de s'AOU de Tàtari.
In custu ùrtimu annu sos Fìsicos de sa Ssd de Fìsica sanitària de sa Asl de Tàtari ant fatu medas test a su machinàriu chi ant mustradu resurtados òtimos. Sos Fìsicos ant implementadu, pro sa Setzione de Radioterapia de s'AOU de Tàtari, custa metòdica noa chi at a permìtere de pòdere tratare medas malàidos oncològicos chi finas a oe beniant mandados a àteros tzentros, a s'ispissu a foras de sa regione.
Su Diretore Sanitàriu de sa AOU de Tàtari Dr Màriu Manca at naradu:" Sos primos tratamentos ant a èssere fatos dae sa Setzione de radioterapia giai dae su mese de cabudanni e ant a pertocare a s'incumintzu sos tumores de su distretu Conca-Tzurcu, distretu de eletzione pro sa presèntzia in sede peritumorale de medas òrganos sanos chi devent èssere defensos dae su tratamentu radioteràpicu. In sos meses imbenientes ant a èssere tratados cun sa tècnica a intensidade modulada finas malàidos chi sufrint de patologias pèlvicas e purmonares".