Tàtari - Dae sa cursa cun sas balletas, a sas proas de lestresa e bravura, intre isport e giogu, sos pitzinnos e pitzinneddos de su bighinadu de San Donato in Tàtari sas dies coladas fiant in sa pratza in dae in antis a sas iscolas elementares. A su mancu 70 pitzinnos intre sos 6 e sos 20 annos ant partetzipadu a sa manifestatzione “Stragiocando a San Donato”, organizada dae sa parròchia de San Donato e San Sisto, cun su patronadu de sa Comuna.
S'initziativa, nàschida s'annu coladu, sighit cun cuntentesa manna e rapresentat unu mamentu de agregatzione de importu. Pro totu sa serada, gràtzias a s'impinnu de sos voluntàrios e de su pàrracu, don Virgìlio Businco, sos pitzinnos e sos pitzinneddos de San Donato ant torradu a apretziare sa bellesa de su giogu in sas carreras, a fàghere amighèntzias noas e a si disvagare in cumpàngia.
In sa foto: sos pitzinnos impinnados in sos giogos