S'Alighera - Sa Comuna de s'Alighera e sa Direcció General de Política Lingüística del Departament de Cultura de la Generalitat de Catalunya sunt giughende a dae in antis un'istùdiu pro connòschere s'impreu e sa vitalidade de sas limbas presentes in su territòriu de s'Alighera, naradu Enquesta d’usos lingüístics a l’Alguer 2014. Sos datos de s'inchesta ant a èssere regortos tràmite s'intervista a 625 residentes aligheresos, dae 18 annos in susu, isseberados cun unu protzedimentu casuale.
Sas pessones isseberadas ant a retzire a domo una lìtera informativa imbiada dae sa Comuna de s'Alighera, e ant a pòdere isseberare si fàghere s'intervista diretamente in domo issoro, tràmite una visita de un'incarrigadu de sa comuna, o si nono ant a pòdere andare in una de sas sedes postas a disponimentu dae sa comuna matessi. Sas intervistas ant a èssere fatas dae s'Ufìtziu comunale pro sas Polìticas lingusìsticas e dae un'iscuadra costituida ad hoc pro su progetu.
A s'istùdiu collàborat s'ufìtziu de rapresentàntzia in s'Alighera de sa Generalitat de Catalunya e s'ufìtziu de istatìstica comunale. Sos resurtados de s'istùdiu, fundamentale pro connòschere sa vitalidade de sas limbas presentes in s'Alighera, ant a èssere publicados in su primu semestre de su 2015. Su progetu at a èssere presentadu martis su 29 de trìulas in Sant'Anna e at a èssere presente su sìndigu Màrio Bruno, su diretore de s’Espai Lull Joan Adell e Giuseppe Calaresu, de s'Ufìtziu Servìtzios Culturales e Polìticas Linguìsticas de sa Comuna de s'Alighera.