Tàtari - A s’incras de sas protestas de sos traballadores de sa “Multiss”, aboghinadas un’àtera borta dae subra de su palatzu de rapresentàntzia de s’amministratzione [LEGGI] e a pustis de sas rechestas de sa Presidente de sa Provìntzia de Tàtari Alessandra Giudici a su presidente de sa Regione Frantziscu Pìgliaru, invitadu a deliberare intro de cras mèrcuris 23 de trìulas, su trasferimentu de su dinare a intro de sas cassas giai bòidas de sa Provìntzia pro evitare su litzentzianmentu de 150 dipendentes de sa sotziedade, in tzitade si sighit a discùtere de s’ausèntzia de dinare e de sa situatzione sotziale e assistentziale drammàtica [LEGGI].
Difatis, sas dies coladas si sunt riunidos in sa sala Angioy, su Cussìgiu e sa Giunta de sa Provìntzia de tàtari, sos segretàrios confederales e de sas categorias interessadas de Cgil,Cisl, Uil de Tàtari e de sa Gaddura, sos sindacados Ugl e Css, sos assòtzios datoriales, sos assòtzios de sas pessones àbiles diversamente e de sas famìlias issoro pro analizare su fatu chi sa Regione at truncadu dae su Fundu ùnicu de sos Entes Locales pro su 2014 giai 4 milliones e 300 mìgia èuros. Unu bucu finantziàriu mannu chi at ispintu sos presentes a dimandare un’addòviu urgente a Pìgliaru e a sa Giunta regionale cun s’obietivu de agatare solutziones ùtiles pro nche torrare su dinare decurtadu. Dinare chi, comente est istadu pretzisadu in cuss’ocasione, est istadu bogadu dae sa Giunta Cappellacci, cajonende unu disacatu mannu a sos tzitadinos de sa Provìntzia de Tàtari e de s’ìsula.
«Custu dinare truncadu - ant declaradu a custu propòsitu su presidene de su cussìgiu e sa presidente de sa Provìntzia de Tàtari, Enrico Piras e Alessandra Giudici – faghet dannu mannu a s’istadu sotziale, a s’iscola, a sos servìtzios sotziales, a sa manutentzione de sas iscolas e de sas istradas e, duncas, conditzionant meda s’ocupatzione in sos setores de riferimentu. Difatis, sunt in arriscu sas funtziones fundamentales de sa Provìntzia ligadas a s’iscola, a sa viabilidade, a sa protetzione tzivile e a s’ambiente, cun cunseguèntzias a cumpromìtere, e nde tzitamus setzi calicuna, sas manutentziones de sas iscolas superiores, sa possibilidade de sos istudentes disàbiles de pòdere arribare a sas iscolas cun mezos de trasportu ispetzìficos e de pòdere tènnere s’assistèntzia de base e ispetzialìstica in àula, su pagamentu de sas locatziones pro sos istudentes in sos cunvitos, sos apaltos pro pulire dae s’erba e su mantenimentu de sos cuntratos cun sa Multiss».