Tàtari - Ite faghet un’autore televisivu? Comente si faghet unu programma televisivu? Comente s’iscriet unu copione? Chie isseberat sos òspites? Una cantas letziones pro cumprèndere cales sunt sos mecanismos chi règulant sos ispetàculos televisivos e pro rispòndere a sas dimandas chi a s’ispissu nos ponimus in dae in antis a tzertos programmas.
Bator addòvios cun espertos de su setore, chi ant traballadu in carchi ispetàculu famadu pro iscobèrrere sos secretos de su mestieri e pro imparare a abbaidare sa televisione cun ogros diferentes.Su cursu lu faghet Matteo Bianchi (iscritore e autore de programmas de televisione comente “Victor Victoria”, La7; “Quelli che il calcio”, Rai Due; “E poi c’è Cattelan”, Sky Uno) e at a partetzipare Enzo Rammairone (autore de programmas culturales comente “Cult Books” e “Scrittori per un anno”, Rai Educational) e Lorenzo Campagnari (autore de trasmissiones de sutzessu mannu comente “Grande Fratello” e “Buona domenica”, Canale 5; “X Factor”, Sky Uno.
Su laboratòriu s’at a fàghere in Messaggerie Sarde, in pratza de Castello 11 in Tàtari, dae martis 23 a giòbia 24 de trìulas, dae sas 6 de bortaedie a sas 8 de sero. Totu sos tres addòbios costant 40 èuros. Pro informatziones e iscritziones: info@festivalargentiera.it.