Tàtari - Est istada inaugurada custu mangianu (martis) sa biblioteca universitària chi est in s’uspidale tzivile de Pratza de Fiume. Una sede prus manna pro sos istudentes, in cunfrontu a s’istrutura de pratza Universidade in ue b’at a èssere dae como in susu sa biblioteca de Giurisprudèntzia: in totu s’istàbile nou b’ant a èssere a su mancu treghentamìgia volùmenes, est a nàrrere sete chilòmetros de libros, e belle otanta postos pro si sèdere. In cada sala b’at oto postatziones cun cullegamentu internet e ispàtzios pro sos ipovedentes.Sos traballos de restàuru, incumintzados in su 2007, sunt istados fatos in su bonu de s’istrutura ma est galu difìtzile a nàrrere cando at a tancare de su totu su cantieri. Su traballu longu at torradu a abivare unu monumentu istòricu de s’incumintzu de su sèculu XIX. In su primu pianu de s’istàbile, a ora de sas 11.30, b’at àpidu sa tzelebratzione in ue bi fiat sa sutasegretària a sos Benes culturales Frantzisca Barràcciu, su retore de s’universidade de Tàtari Attilio Mastino, su sìndigu Nicola Sanna, su presidente de su cussìgiu regionale, su diretore regionale pro sos Benes paesagìsticos de sa Sardigna, Maria Assunta Lorrai e su diretore de sa biblioteca universitària Maria Rosaria Manunta. A pustis de sa tzerimònia su pùblicu at visitadu sa biblioteca in ue como traballant 32 dipendentes.