Tàtari – Tempos longos e filas sena fine caraterizant su Tzentru Iperbàricu Tataresu, cun sas prestatziones semper prus minimadas. Una làstima a beru pro s’istrutura chi tenet una càmera iperbàrica cun dòighi postos aprontada cun sas tecnologias prus modernas de seguresa e de comodidade pro terapias de ambulatòriu e finas su primu tzentru in Sardigna chi impreat misturos respiratòrios ipertòssicos pro curare sas patologias embòlicas de sos subàcueos. Mancari b’apat sa modernidade de su servìtziu, su de isetare de sos patzientes pro s’intrada in sa càmera s’illònghiant sena mesura, mescamente si si pessat chi carchi patologia benit tratada in prus de unu tziclu de 24 o de 32 setziadas cadauna.A denuntziare totu custas dificultades est iRS, tràmite su cussigieri regionale Gavino Sale, chi s’est ativadu deretu, presentende un’interrogatzione relativa a su funtzionamentu de sa càmera iperbàrica de su Tzentru tataresu, cumbintu de s’importàntzia “de sistemare sas dificultades a sos utentes e de megiorare sa calidade de sos servìtzios a su tzitadinu”. In sa foto: Gavino Sale, cussigieri regionale de iRS