Tàtari - Dies detzisivas pro connòschere su tempus benidore de sa giunta comunale ghiada dae su sìndigu Nicola Sanna. Su clima nervosu de sas dies coladas mantenet arta s’atentzione subra de sos raportos intre su primu tzitadinu e sos ùndighi cussigieris chi ant pedidu s’annulamentu de sa giunta. In una lìtera pediant un’annullamentu chi, pro como, abarrat suspesu ma chi at innescadu reatziones noas in su mundu polìticu. In sas decraratziones dadas sas dies coladas a sa “Nuova Sardegna” su primu tzitadinu ammentaiat sa proposta sua de collire tres de cussos 11 cussigieris in sa giunta. Su dibatidu no est abarradu firmu in su nord de Sardigna e finas s’ex sìndigu Gianfranco Ganau, presidente como de su Cussìgiu regionale, ha mandadu una lìtera a Nicola Sanna. In sa lìtera Ganau at fatu carchi crarimentu e at dimandadu unu sensu de responsabilidade prus mannu dae parte de totus e dae parte de su sìndigu Sanna. E a pustis de Ganau, finas Sarvadore Demontis, cussigieri regionale de su Pd, at iscritu in sa bacheca sua de facebook una lìtera longa a su primu tzitadinu in ue at sutaliniadu s’importu de una fide cuncambiada subra de cuestiones diferentes. Nd’amus a ischire de prus a pustis de sos addòvios de custu borta de die in ue su sìndigu at a addobiare su grupu Pd e a pustis sa coalitzione.