Tàtari - "Enerloc est una cosa giai afirmada, bidu chi sunt giai oto editziones chi traballamus in manera produtiva. Custa manifestatzione at mustradu de èssere una rassinna de progetos innovativos. At permìtidu de introduire una metodologia de traballu basada subra de s'efitzièntzia energètica". Sunt sas paràulas de su sìndigu de Tàtari, Nicola Sanna, chi in sa sede de sa Càmera de cummèrtziu de su Nord Sardigna at abertu sos traballos de Enerloc, s'apuntamentu de cada annu organizadu dae Promo PA Fondatzione subra de sos temas de s'istàrviu energèticu e de sas energias rennoàbiles.
"B'at meda de fàghere - at sighidu su primu tzitadinu de Tàtari. Semus intrados in una fase de realizatzione de indùstrias eco sustenìbiles, siat pro su chi pertocat sos produtos siat pro sas energias impreadas: so faeddende de s'inauguratzione de Matrìca in Portu Turre".