Tàtari - Sas pratzas, sos parcos e sos teatros de sa tzitade s'aprontant pro bìvere un'istiu ricu de eventos. Dae su 21 de làmpadas, sa die de su solstìtziu e de sa festa europea de sa mùsica. Su parcu de Monserrato, sos giardinos pùblicos e pratza Santa Caterina s'ant a abivare cun cuntzertos e ispetàculos musicales. Sa festa de sa mùsica sinnat su cumintzu ufitziale de "Sassari estate", 4 meses de eventos, dae làmpadas a cabudanni, chi at a tènnere su mamentu prus de importu su 14 de austu, cun sa falada de sos Candelieris, sa prima dae cando sunt istados decrarados dae s'Unesco patrimòniu de s'umanidade. B'ant a èssere finas àteros eventos comente s'anteprima de Narcao Blues su 3 de trìulas in pratza de Tola cun Fabio Treves e la Blues band, su Sardinia Film Festival dae su 23 a su 28 de làmpadas in su Quadrilatero in carrera de Mancini, Sassari Blues Festival su 10 e s'11 de trìulas cun Marcus Malone Band e Lisa Mills e sa Band of friens. S'istiu tataresu at a èssere ricu meda cun su tzìnema, cun "Time in Sassari" in pratza de Tola su 17 e su 18 de trìulas e cun "Figiurà Festival" dae su 21 de trìulas a su 24 de austu cun sas presentadas de autores e àteras initziativas. Àteros apuntamentos: "Sulla terra leggeri" da su 24 a su 27 de trìulas intre Tàtari e Argentiera e finas "Girovagando" e "Sotto il cielo le stelle".