Tàtari - At a èssere giòvia su 19 de làmpadas a sas 9 in Tàtari in s'àula Manunta, un'addòviu formativu intituladu “Blue tongue e miasi: nuove e vecchie patologie dell’ovino legate ai ditteri”, destinadu a dotores veterinàrios pùblicos e privados. Ant a èssere esaminadas sas problemàticas sanitàrias cajonadas dae sa tzirculatzione de su sierotipu reghente Btv1 siat diretamente subra de sos animales retzetivos, siat indiretamente in s'isfera riprodutiva e finas miasis importantes comente s’oestrosi òvina e cussa cutànea dae wohlfahrtia magnìfica. S'addòviu, cun su patronadu de sa dita "Msd animal health" e chèrfidu dae su dipartimentu de Meighina veterinària de s'ateneu tataresu, s'at a fàghere cun sa collaboratzione de su dipartimentu de Preventzione de sa Asl de Tàtari e de s'Istitutu zooprofilàticu isperimentale de Sardigna e at a èssere moderadu dae Marco Pittau, ordinàriu de Maladias infetivas de su dipartimentu de Meighina veterinària e dae Franco Sgarangella, diretore de su dipartimentu de Preventzione de sa Asl de Tàtari.
Ant a interbènnere Pittau e su professore Antoni Scala de s'Universidade de Tàtari, sos dotores Ciriaco Ligios e Cipriano Foxi de s’Izs de Tàtari, sa dotora Daniela Marongiu de sa Asl de Tàtari e su dotore Pietro Antenucci de sa dita ditta Msd animal health.
Sas relatas ant a fàghere su puntu subra de sa limba blu, subra de s'epidemia 2013, subra de sos dannos cajonados dae sa maladia a sas berbeghes, subra de sas istrategias de controllu e subra de sa preventzione, in particulare subra de s'importàntzia de sa profilassi direta cun sas mesuras de luta a s'insetu vetore de su virus, tràmite s'impreu de repellentes subra de sos animales sensìbiles.
Sa maladia at cajonadu dannos medas a prus de 25 mìgia ovinos mortos atzertados dae sa Asl e cun dannos indiretos in s'àmbitu produtivu e riprodutivu.