S'Alighera - A sa fine finas Pìgliaru at naradu chi emmo. Sàbadu coladu est arribadu su patronadu de sa Presidèntzia de sa Giunta regionale a su "Sardegna Pride". A pustis de sa presidèntzia de su Cussìgiu regionale, sa Provìntzia de Tàtari e sas comunas de Tàtari, Casteddu, Terranoa, s'Alighera, Portu Turre, Tissi, Bànari, Bòtidda, Aristanis e Mògoro, finas sa Giunta regionale de Sardigna aproat sa manifestatzione pro sas libertades e sos deretos de totus.

Su nùmeru mannu de patronados, 14 in totu, sutalìniat sa partetzipatzione manna a custa segunda editzione de su "Sardegna Pride", promòvidu dae su coordinamentu sardu de sos assòtzios gay, lèsbicas e transgender chi ocannu s'at a fàghere pro sa prima bia in s'Alighera.

Sunt giai medas sos postales organizados dae diferentes partes de Sardigna e medas si nde sunt annanghende. S'Alighera s'est aprontende e sa butega artesana de coraddu "La Corallina", at ammaniadu una prenda pròpiu pro custa manifestatzione: unu chircu de coraddu chi cuntenet su sìmbulu maschile e cussu femminle a s'internu. Medas àteras butegas snt aprontende sas vetrinas cun sos colores de s'arcu de chelu caraterìsticos de su movimentu GLBTQ (gay, lèsbicas, bisessuales, transgender, queer).