TATARI - Sàbadu 24 e domìniga 25 de maju, s'UNICEF at organizadu in milli pratzas italianas sa campagna “100percento Vacciniamoli tutti”, pro regòllere dinare in favore de totu sos pitzinnos chi sunt galu esclùdidos dae sas vatzinatziones. In càmbiu de un'òferta de 5 èuros, si podent comporare sessanta vatzinos contra a ses maladias malas (pòlio, morbillu, pertosse, tètanu, difterite e tbc) pro deghe pitzinnos chi arriscant de mòrrere ca non b'at curas addatas.

Sos voluntàrios de s'UNICEF ant a cunsignare sas campaneddas cun unu nastru biaitu pro sonare a manera simbòlica s'allarme e pònnere s'atentzione subra de su dramma chi faghet mòrrere unu pitzinnu cada vinti segundos pro maladias chi si podent prevènnere e chi si podent curare cun unu vatzinu. Sunt chimbe sas postatziones de "Vacciniamoli tutti" in Sardigna: in pratza de sa Mercede in s'Alighera, in pratza de Castello e in sa Club house de sa Dìnamo Basket, in carrera de Nenni, in dae in antis a su “PalaSerradimigni”, in Tàtari, in Valledòria, e in Viale Sardigna in Santa Maria Coghinas.

Sa campagna 100 pro 100 "Vacciniamoli tutti" at a sustènnere oto Istados in ue b'at unu cuartu de sas mortes infantiles in su mundu: Afghanistan, Angola, Repùblica Democràtica de su Congo, Ciad, Nigèria, Pakistan, Sud Sudan e Yemen. In custos Istados, belle 6 milliones de pitzinnos non sunt galu vatzinados e medas de custos bivent in logos sena servìtzios sanitàrios pro curpa de sas gherras, de sa povertade, pro sa mancàntzia de unu sistema sanitàriu o conflitos sotziales.

In custos ùrtimos annos, gràtzias a sa cobertura mundiale de s'80 %, est minimada meda sa mortalidade infantile, ma s'UNICEF cheret arribare a cussu 20% chi arrisca de mòrrere. In su mese de abrile, s'UNICEF - Oms at agabadu una campagna de vatizinatziones antipòliu in Sìria, Iraq e Egitu pro prus de 20 milliones de pitzinnos.