TATARI - Dae su 16 de maju su Servìtziu Limba Sarda de sa Regione est sena ghia: Pepe Coròngiu no est prus su diretore de s'Ufìtziu de sa limba sarda. Est una detzisione meda discùtida finas in sos blog e in sas retes sotziales, mescamente in custas ùrtimas dies siat dae s'ex diretore ma finas dae carchi cussigeri regionale chi ant leadu sas partes de Coròngiu e mescamente dae sos operadores e dae sos professionistas chi traballant in totu sa Sardigna pro sa promotzione e sa valorizatzione de sa limba sarda e chi faghent parte de su Movimentu Linguìsticu.

Sa Giunta Pigliaru no at chèrfidu cunfirmare unu Diretore chi at traballadu in custos ùrtimos deghe annos cun operatividade e cumpetèntzia e cun s'obietivu de fàghere a manera chi sa limba sarda torret a èssere una limba normale, chirchende de pònnere a bandas sas cuntierras e sas divisiones pro dare valore a sa limba de sos sardos. A dolu mannu si faeddat finas de tancare sos Servìtzios de sa Regione cun diretore vacante e de fàghere "un'acorpamentu" cun àteros servìtzios. Si tratat finas de medas postos de traballos pèrdidos. Unu sinnale negativu pro su Servìtziu de sa limba sarda chi faghet dannu in custu mamentu a sas atziones ligadas a sa polìtica linguìstica atuadas in custos annos pro torrare a abivare su sardu, su catalanu de s'Alighera, su tataresu, su gadduresu e su tabarchinu.

Medas de custas atziones polìticas de sa Giunta regionale fortzis sunt cullegadas a sa discussione animada subra de sa LSC (Limba Sarda Comuna), norma ortogràfica regionale chi est impreada in medas cuntestos: in sas amministratziones pùblicas, in s'iscola, in sos mèdios de comunicatzione e dae sos editores pro sa publicatzione de sos libros in sardu, gasi comente diat dèvere èssere pro una limba normale. Su diretore nou at a tènnere unu còmpitu difìtzile pro realizare e cuncretizare su Pianu Triennale nou, istrumentu de programmatzione pro sa limba sarda, prevìdidu dae s'artìculu 12 de sa lege regionale 26 de su 1997. In custu mamentu su Pianu Triennale 2011-2013 est de seguru superadu e sa Giunta e s'Assessore sunt in retardu forte bidu chi su pianu triennale est iscàdidu in su 2013 e semus giai a mitade de su 2014. Sa prova pro sa giunta Pigliaru est oe cussa de atuare una voluntade polìtica atuada in custos annos in Sardigna pro sa limba sarda e sas variedades alloglotas de Sardigna pro sa modìfica de s'Istatutu Ispetziale e pro sa ratìfica de sa Carta europea de sa limbas minoritàrias.