TATARI - Sètzida in sas iscalas de su tribunale e cun sas cadenas pro dimandare galu giustìtzia. In suta de su sole dae mangianu, intre sa gente chi colat e calicunu chi li dimandat si cheret unu cafè o una tassa de abba. Dèbora Cossa torrat gràtzias ma narat chi non cheret bìere nen mandigare. Cheret setzi una resposta: «Chèrgio ischire si est istada firmada s'ordinàntzia pro nche bogare sas pessones chi ant ocupadu sa domo mea. M'ant naradu chi depo isetare. Est fàtzile pro chie tenet una domo ma deo sigo a dormire in sa corte».

Mòvida dae Sitzìlia pro pagos meses, Dèbora, 40 annos e disocupada, torrada a Tàtari at agatadu domo sua ocupada dae àteras pessones. «Apo proadu a lis fàghere cambiare idea, lis apo naradu de si nche mòvere, ma non b'at àpidu nudda de fàghere» at contadu sa fèmina. Una protesta chi non cheret firmare finas a cando no at a resessire a torrare in cussu apartamentu chi carchi annu a como l'at dadu sa comuna de Tàtari.