TATARI - Sunt belle 360 sos candidados de sas listas eletorales de s'alleàntzia de tzentru manca chi ant a apogiare a Nicola Sanna comente candidadu a sas eletziones de su 25 de maju. In totu sunt 12 sìmbulos: Pd, Partito dei sardi, Rossomori, Sel, Irs, La base, Idv, Centro democratico, Libertà e movimento, Sassari bella dentro, Ora sì e Upc.
«Cherimus dare unu messàgiu de unu tzentru manca unidu e forte» at naradu Nicola Sanna presentende sa candidadura sua a sìndigu de Tàtari. «Est unu programma de 12 puntos in ue est istada fata sa sìntesi de unu progetu de realizare in chimbe annos. Amus sas conditziones polìticas e amministrativas pro dare a sa tzitade unu còmpitu de ghia de su Nord de sa Sardigna. In sas listas nostras - at sighidu Sanna - b'at pessones chi benint dae cada setore sotziale de sa tzitade, istudentes, operadores de su cummèrtziu, professionistas e àteros. Sunt candidados chi ant a cumbìnchere a andare a votare sos astensionistas». In sas listas b'at 150 fèminas e finas cussigeris comunales in essida e medas rapresentantes de su mundu de sos assòtzios. S'addòviu cun sos candidados e sa presentada de su programma est pro lunis 28 de abrile a sas ses de borta de die in su Teatru Smeraldo in su Monte Rosello.