TATARI - Su 16 de abrile coladu b'at àpidu in su Museu Natzionale “G. A. Sanna” de Tàtari sa presentada de sa mustra "Stationes. Passione, resurretzione e devotzione in su tempus. Caminu artìsticu, archeològicu e etnogràficu".
Sa mustra, gràtzias finas a sa comuna de Bonorva e a s'artzidiotzesi de Tàtari, est formada dae cuadros de Tonino Delogu. In su pranu bassu de su Padiglione Clemente sos cuadros descrient sas religiones monoteistas prus mannas, mentres in su primu pianu bi sunt, una in fatu de s'àtera, sas istatziones de sa Passione e de sa Resurretzione de su Cristos, intrepretadas liberamente.

Sa mustra est irrichida dae materiales archeològicos paleocristianos de sas colletziones de su Museu Samma, comente esempru una seletzione de làmpanas de orìgine africana cun sìmbulos cristianos e ebràicos, e dae testimonias paleocristianas e artumedievales de Portu Turre, Tàtari, Cornus. Sa colletzione etnogràfica est rapresentada dae elementos de su bistire e de sa tessidura de sa traditzione de Bonorva, donu a sa comunidade chi at àpidu una parte importante in custa manifestatzione.

S'artzidiotzesi de Tàtari at postu a disponimentu pro sa mustra carchi istatuedda de linna chi benit dae sas crèsias de Bonorva e chi rapresentant Santa Giulia, Santa Luchia, Santu Micheli, s'Immacolada, Santu Giuanne.
Sa mustra Stationes est istada aprontada dae su personale de sa Subraintendèntzia e dae sa Sotziedade ALES e ant agiudadu finas sos dischentes de su cursu pro responsàbile de sa Gestione e sos Museos de su C.R.F.P. de Tàtari.
Sa mustra si podet bisitare finas a s'11 de maju.