TATARI - Bator cussigeris regionales de su Pd Gianfranco Ganau, Gavino Manca, Salvatore Demontis e Luigi Lotto dimandant a su segretàriu provintziale de su PD Lorenzoni de nche ritirare sas dimissiones e de «sighire a ghiare, cun autorevolesa e istabilidade, custa fase eletorale difìtzile, garantende s'unidade de su Partidu e de s'alliàntzia pro bìnchere sas eletziones e pro torrare a cunfirmare sa coalitzione de tzentru manca pro guvernare sa tzitade de Tàtari e sos àteros comunos de sa Provìntzia».

A issos s'aunit Ànghela Mameli, sa candidada chi at pèrdidu sas primàrias in Tàtari «li dimando de nos agiudare, comente at fatu finas a como, a nche tancare bene custa fase». Mameli, a pustis, cunfirmat s'acordu pro su resurtadu de sas urnas. «Cunfirmo - at sighidu s'ex assessora - sa voluntade mea e sa disponibilidade mea pro nche agabbare custa discussione, comente apo mustradu giai dae su primu mamentu. Rapresentende totu sos sostenidores de sa candidadura mea apo chircadu de congruire un'acordu polìticu chi esseret rispetadu totu sas ideas».