TATARI - Sa Comuna de Tàtari leat parte a su Pranu istraordinàriu de sa Regione Sardigna e atuat unos cantos progetos chi ant a interessare 120 traballadores chi no ant amortizadores sotziales. L'at detzisu su Cummissàriu istraordinàriu Guido Sechi.

Su pranu istrordinàriu pertocat un'agiudu dadu dae s'Inps pro màssimu ses meses a favore de traballadores chi no ant amortizadores sotziales e tenent sas cumpetèntzias prevìdidas in s'avisu de sa Regione. Sos benefitziàrios ant a traballare in setores diferentes de s'Amministratzione.

Cunforma chi sos interessados siant de su setore èdile o genèricu, e cunforma a sas caraterìsticas de cadaunu, ant a pòdere fàghere atividades de apògiu a sas operatziones de manutentzione e positzionamentu de sa signalètica istradale o de su patrimòniu comunale (torrare a fàghere sos pamentos istradales, intonigare, fàghere sas òperas èdiles); sustegnu a sas atividades de birde pùblicu, igiene urbana e ambientale o in fines a sas atividades amministrativas in setores diferentes de s'Ente.