TATARI - A pustis de su terremotu in intro de su Pd in ue sas ùrtimas dies b'at àpidu sas dimissiones de Giosepe Lorenzoni, segretàriu provintziale de su Pd e, a pustis de s'iscàmbiu de comunicados in sas retes sotziales intre su binchidore de sas primàrias de su tzentru manca Nicola Sanna e Sìlvio Lai, segretàriu regionale de su PD, in sa "domo democràtica" paret chi sient torrende sas paghes.

«Apo esageradu cun sos tonos» at atrogadu Nicola Sanna, candidadu a sìndigu in Tàtari pro su tzentrumanca. Cun unu comunicadu at dadu unu messàgiu craru de cuncòrdia a Sìlvio Lai «Nois semus italianos e amus unu naturale forte ma semus semper a disponimentu pro fàghere sas paghes, finas a pustis de tres dies de suferèntzia. Isco bene chi totus semus netzessàrios e fundamentales pro arribare a unu resurtadu chi no est fàtzile ma chi rechedet s'impignu e sa passèntzia de totus. So impignadu a manera responsàbile a rapresentare a totus, siat oe e siat cras, in su guvernu de sa tzitade. A su segretàriu provintziale de su Pd Giosepe Lorenzoni e a cussu regionale Sìlvio Lai fatzo un'invitu corale pro chi m'abbarrent issoru in custu mamentu difìtzile».

Sanna at naradu finas «In sa cultura democràtica americana, unu mamentu a pustis de su resurtadu, su chi perdet mutit deretu su binchidore pro si nd'alligrare e pro li torrare gràtzias». Su referimentu a pessones o fatos no est pròpiu casuale.