TATARI - Su 10 de abrile coladu b'at àpidu sa presentada de su libru de poesias “Les mies mans” de Antoni Canu. Custu fiat su de tres apuntamentos de “Limba e libros in su Museu Sanna”, sa manifestatzione ammaniada dae s'Ufìtziu Linguìsticu de sa Limba Sarda e Catalana, de su Servìtziu Limba Sarda de s'Assessoradu Regionale a s'Istrutzione Pùblica cun sa collaboratzione de su Ministèriu de sos benes e atividades culturales. Giuliana Portas, de s'Ufìtziu linguìsticu regionale, at moderadu sa dibata. Est intervènnidu Fàbio Solinas, Presidente de s'Assòtziu ÀndalaNoa e Dàvide Casu chi at cantadu in aligheresu e finas in sardu.

A s'iniztiativa fiat presente s'autore chi at lèghidu sas poesias suas. Su libru "Les mies mans" contat s'ammentu de sos tempos antigos, cando si traballaiat in sos campos istende in mesu de gente. Antoni Canu est nàschidu in Otieri ma a 10 annos si nch’andat a istare a s'Alighera. Sa limba mama sua est su sardu ma, dae tando, su catalanu de s'Alighera si faghet sa limba sua printzipale, imparada sighende finas sos cursos de la "Escola de Alguerés Pasqual Scanu" e sas initziativas de s'Assòtziu Obra Cultural de l'Alguer.

At publicadu tres libros de poesias: "Poesies" (1995), "En l'arc dels dies" (2000) e "Nou Cant" (2007) retzende prèmios meda e reconnoschimentos a livellu natzionale e internatzionale. Totu sas initziativas promòvidas in Tàtari dae su Servìtziu Limba Sarda de sa Regione, pro more de sa grandu collaboratzione cun su Ministèriu pro sos benes e sas atividades culturales, servint pro valorizare sa limba sarda e sas variedades alloglotas de Sardigna. S'addòbiu imbeniente de "Limba e libros in su Museu Sanna" at a èssere giòbia s' 8 de maju cun sa presentada de “S’istrumpa”, cun s'autore Piero Frau.