TATARI - Tres bandos, unu matessi obietivu: interessare sa comunidade de su nord-ovest de sa Sardigna a sos argumentos cullegados a sa cultura de sas oportunidades aguales intre totu sas tzitadinas e totu sos tzitadinos. Est custu s'impignu de sa Cummissione pro sas oportunidades aguales de sa Provìntzia de Tàtari chi pro custu motivu at publicadu dae pagu tempus tres cuncursos diferentes. Su primu, chi tenet comente tìtulu “Fèminas pro una die, mamas pro semper” chi iscadet su 12 de maju e faghet parte de sas initziativas chi in custu mandadu sa Cummissione at pensadu e ammaniadu pro sensibilizare s'opinione pùblica subra de sa disabilidade intelletiva. Su cuncursu, destinadu a sas mamas de pessones cun custa casta de disabilidade, previdet sa regorta de poesias e de contos chi a pustis ant a èssere impreados comente istrumentu de divulgatzione e de sensibilizatzione. Sos primos tres iscritos ant a retzire 700 èuros cadaunu chi ant a bènnere dados durante una manifestatzione pùblica in ue ant a èssere presentados sos traballos premiados.

Su segundu cuncursu chi iscadet su 30 de abrile, si intìtulat "“Conta cun unu vìdeu sa violèntzia de sos òmines contra a sas fèminas”. Custa gara, posta intre sas atividades contra a sos fenòmenos de violèntzia a sas fèminas e de su femminitzìdiu, previdet s'acumprida de unu cortometràgiu de 200 sicundos màssimu, de impreare comente istrumentu de promotzione e de publitzidade sotziale. Su bandu est abertu a sos registas giòvanos chi non sunt professionistas e amatoriales chi apant fatu degheoto annos e non nde apant prus de baranta. In prus, nch'est agabbende su progetu "Alice". Tràmite custu progetu, sa Cummissione pro sas Oportunidades Aguales de sa Provìntzia de Tàtari at publicadu tres bursas de istùdiu de milli èuros cadauna de dare a sas tres tesis de làurea sas mègius chi apant tratadu temàticas de gènere. Intro de sa chida chi intrat, s'at a addobiare sa cummissione esaminadora chi at a tènnere su còmpitu de cunsiderare totu sas tesis chi ant leadu parte e isseberare a chie dare su prèmiu.