Tàtari - Sàbadu su 12 de abrile si torrat a votare pro su ballotàgiu. Sos primos duos prus votados sunt istados Ànghela Mameli, assessora a sa Cultura in sa prima giunta Ganau, chi at àpidu su 29 % (2986 votos) e s'assessore betzu a su bilàntziu Nicola Sanna chi at leadu su 24,8 % (2641 votos). In su de tres postos s'est collocadu Gianni Càrbini, ex assessore issu puru in sa segunda giunta Ganau, chi at pigadu su 22,9% (2446 votos). In su de bator postos Mònica Spanedda cun su 15,6% (1668 votos). S'ùrtima, Alessandra Giudici, Presidente de sa Provìntzia de Tàtari, chi at leadu setzi s'8,4% cun 892 votos ebbia.

«Su resurtadu de su votu de sas primàrias m'agradat meda, ca medas tzitadinos ant leadu parte a custas primàrias» at naradu Mameli. «So sa candidada chi at àpidu prus votos in su primu turnu e custu mi dat una fide manna pro su ballotàgiu. Como detzidet sa tzitade. Amus a faeddare galu cun sos tzitadinos comente amus fatu in custas 15 dies». «Su resurtadu est su sinnale de una proa bella meda de partetzipatzione e de democratzia» at cummentadu Sanna.

«Tàtari si cunfirmat una tzitade bia chi at cumprèndidu su sensu de sa netzessidade de su rennoamentu de sa classe polìtica, promovende tres assessores, Sanna, Càrbini, Spanedda, chi cun istiles diferentes ma animados dae sa matessi voluntade pro su cambiamentu, rapresentant su 64,5 de s'eletoradu de su tzentrusinistra, disigiosu de sighire a guvernare sa tzitade. So seguru chi su ballotàgiu at a cunfirmare custa tendèntzia, ca apo a sighire a cunsolidare s'unidade de su Pd e su raportu cun sa coalitzione chi s'at a pònnere in acordu cun custa netzessidade de cambiamentu».